|
Noch ein Gedicht ...
BUIDUNGSLUCKN
Wer heit für d'Buidung was doa wui,
gäht, wia ma woaß, in d' Volkshochschui.
Am Maier is des sonnenklar,
belegt drei Kurs, zwoa Seminar.
Von Wissenschaft und von da Kunst,
do hod a friahra ghabt koan Dunst.
Jetz woaß a, wer auf dera Welt
wos gleistet hod und wer was zählt.
Er kennt an Klee und an Kandinsky,
an Bach, an Händel, den Strawinsky.
Woaß, was da Michelangelo
in Florenz und Rom hod do.
Bloß an Biermoser Fonse kennt a ned.
Er kennt de Gsetza vom Isaac Newton
und as Lebenswerk von Konrad Duden.
Woaß, dass d'Steinin war vom Goethe s' Gspusi,
kennt an Grass und an Böll und aa den Marcuse.
Bloß an Biermoser Fonse kennt a ned.
Er kennt den Mosche Feldenkrais.
Hod glernt: da Bismarck war a Preiß.
Vom Luther kennt er gar die Thesen,
woaß wer da Konfuzius is gwesn.
Bloß an Biermoser Fonse kennt a ned.
Er kennt an Zöpfl aa ois Pädagogen
und zäid an Grzimek zu de Zoologen.
Woaß, was da Freud übern Traum hod gschriem
und wos an Kinsey zum Sex-Report triem.
Bloß an Biermoser Fonse kennt a ned.
Da Biermoser Fonse is am Maier ganz fremd.
Woher soi an kenna? Den nennt koa Dozent!
Doch am Maier sei Frau, de woaß ganz bestimmt:
Wenn Vorlesung is, der Biermoser kimmt!
© Heini Almstätter
|
